रत्नागिरी : शहरातील ‘दी गिफ्ट ट्री’ संस्था आणि पुणे येथील हरित मित्र परिवार यांच्या संयुक्त विद्यमाने ‘प्लास्टिक द्या, कापडी पिशव्या घ्या’ हा उपक्रम राबविला जाणार आहे. या उपक्रमाचा प्रारंभ येत्या १४ जानेवारीला मारुती मंदिर येथे केला जाणार आहे. या वेळी प्रमुख पाहुणे म्हणून कर्जत (जि. रायगड) नगरपालिकेचे मुख्याधिकारी रामदास कोकरे उपस्थित राहणार आहेत. BytesofIndia.com हे पॉझिटिव्ह मीडिया पोर्टल या उपक्रमाचे ‘ऑनलाइन मीडिया पार्टनर’ आहे.

प्लास्टिकमुक्त व स्वच्छ रत्नागिरीसाठी नगरपालिकेने कंबर कसली असून, परिसराच्या स्वच्छतेविषयी नागरिकांमध्ये जागरूकता निर्माण करण्यासाठी विविध पर्यायांचा अवलंब केला जात आहे. नगरपालिकेच्या या प्रयत्नांना सकारात्मक प्रतिसाद देत ‘दी गिफ्ट ट्री’ संस्थेचे सिद्धेश धुळप यांच्या पुढाकाराने ‘प्लास्टिक द्या, कापडी पिशव्या घ्या’ हा उपक्रम राबविण्यात येत आहे.

या कार्यक्रमाला रत्नागिरीतील उद्योजक किरण ऊर्फ भैया सामंत, नगराध्यक्ष राहुल पंडित, रत्नागिरी नगरपालिकेचे मुख्याधिकारी अरविंद माळी, सामाजिक वनीकरण विभागाचे श्री. धुमाळ, हरित मित्र परिवाराचे महेंद्र घागरे यांचीही विशेष उपस्थिती असेल.

समाजातील सकारात्मक घडामोडी, चांगले उपक्रम यांना प्रसिद्धी देणारे BytesofIndia.com हे ‘पॉझिटिव्ह मीडिया पोर्टल’ रत्नागिरीतील या उपक्रमाचे ‘ऑनलाइन मीडिया पार्टनर’ आहे.

कार्यक्रमाविषयी :
दिवस : रविवार, १४ जानेवारी २०१८
वेळ : सायंकाळी पाच वाजता
स्थळ : मारुती मंदिर सर्कल, रत्नागिरी